उत्तर प्रदेशात १३ वर्षाच्या अल्वपयीन मुलीवर सामूहिक बलात्कार करण्यात आल्याची धक्कादायक घटना समोर आली आहे. दोन आरोपी मुलीवर बलात्कार करत असताना इतर चार आरोपी व्हिडीओ शूटिंग करत होते अशी माहिती पोलिसांनी दिली आहे. पोलिसांनी कारवाई करत सर्व सहा आरोपींना अटक केली आहे.

पोलिसांनी दिलेल्या माहितीनुसार, “दुपारी दोन वाजण्याच्या सुमारास ही घटना घडली. पीडित मुलगी आपल्या घरी जात असताना आरोपींनी जबरदस्ती करत तिला एका निर्जन ठिकाणी शाळेच्या इमारतीत नेलं. आरोपींमधील दोघेजण पीडित तरुणी राहत असलेल्या ठिकाणी राहतात. त्यांनी तरुणीवर बलात्कार केली. यावेळी इतर चौघे आरोपी व्हिडीओ शूट करत होते”.

“सर्व सहा आरोपींना अटक करण्यात आलेली असून चौकशी सुरु आहे. त्यांच्याविरोधात संबंधित कलमांतर्गत गुन्हा दाखल करण्यात आला आहे. आरोपींनी पीडितेला घटनेबद्दल कुठेही वाच्यता केल्यास जीवे मारण्याची धमकी दिली होती. पीडित तरुणीला वैद्यकीय तपासणीसाठी रुग्णालयात पाठवण्यात आलं आहे,” अशी माहिती पोलिसांनी दिली आहे.