पाकिस्तानमधील पंजाब प्रांतात एका एक्स्प्रेस रेल्वेगाडीनं शीख भाविकांना घेऊन जाणाऱ्या मिनी बसला धडक दिली. या भीषण अपघातात १९ यात्रेकरूंचा जागीच मृत्यू झाल्याची घटना आज दुपारी अडीच वाजताच्या सुमारास घडली. यात ८ जण गंभीर जखमी झाले असून, त्यांच्यावर जिल्हा रुग्णालयात उपचार सुरू आहेत. लाहोरपासून ६० किमी अंतरावर ही घटना घडली. या घटनेनंतर भारताचे पंतप्रधान नरेंद्र मोदी यांनी ट्विट करून शोक व्यक्त केला आहे. पेशावर येथून २२ शीख भाविक एका मिनी बसमधून नानकाना येथील गुरूद्वारात प्रार्थनेसाठी गेले होते. दर्शन झाल्यानंतर हे सर्व भाविक परत पेशावरकडे निघाले होते. परतीच्या प्रवासात असताना सच्चा सौदा फारूकाबाद शेखुपुरा येथील मानवरहित रेल्वे क्रॉसिंगवर त्यांच्या मिनी बसला भरधाव एक्स्प्रेस गाडीनं उडवलं. शाह हुसैन एक्स्प्रेस ही रेल्वे गाडी कराचीहून लाहोरला जात होती. त्याचवेळी मिनी बस समोर आली. लाहोरपासून ६० किमी अंतरावर ही घटना घडली. यात मिनी बसमधील १९ भाविक जागीच ठार झाले. तर ८ जण गंभीर जखमी झाले आहेत. अपघातानंतर बचाव पथकानं घटनास्थळी धाव घेतली. त्यानंतर जखमींना जिल्हा रुग्णालयात दाखल करण्यात आले. A bus carrying Sikh pilgrims was hit by a train in Sheikhupura district in Pakistan's Punjab, 19 passengers killed, 8 injured: Local media pic.twitter.com/udx1E5Aqv7 — ANI (@ANI) July 3, 2020 पंतप्रधान मोदींनी व्यक्त केला शोक घटनेनंतर भारताचे पंतप्रधान नरेंद्र मोदी यांनी ट्विट करून शोक व्यक्त केला. "पाकिस्तानातील शीख भाविकांच्या मृत्यूमुळे दुःखी झालो आहे. दुःखाच्या क्षणी माझ्या सहवेदना मृतांचे कुटुंबीय व मित्रांच्यासोबत आहे. जखमी झालेले भाविक लवकर बरे व्हावेत यासाठी मी प्रार्थना करतो," असं पंतप्रधान नरेंद्र मोदी यांनी म्हटलं आहे.