चीनच्या ईशान्य भागांत गेल्या आठवडय़ापासून कोसळणाऱ्या मुसळधार पावसामुळे आलेला पूर आणि दरडी कोसळण्याचे प्रकार यामुळे किमान २९ जण ठार झाले असून अन्य १४ जण बेपत्ता झाले आहेत, असे वृत्त मीडियाने दिले आहे.हेलॉँगजिआंग, लिआओनिंग आणि जिलीन प्रांतात आलेल्या पुरामुळे १४ हजार लोकांना अन्य जागी स्थलांतरित करावे लागले आहे. पुरात आतापर्यंत २९ जण ठार झाले आहेत, असे झिनुआने म्हटले आहे. गेल्या दशकातील हा मोठा पूर आहे.हेलॉँगजिआंग येथे पुरात २५०० हून अधिक घरांचे नुकसान झाले असून अन्य १२ हजार ५०० घरांची मोठय़ा प्रमाणावर हानी झाली आहे. पूर आणि वादळ यामुळे १८.१५ दशलक्ष डॉलरचे आर्थिक नुकसान झाले आहे.पूरग्रस्तांच्या मदतीसाठी शेनयांग प्रांतातील पाच हजारांहून अधिक अधिकारी आणि सैनिकांना मदतकार्यासाठी तैनात करण्यात आले आहे. पूरग्रस्त भागांत बोटी आणि वाहनेही पाठविण्यात आली आहेत.