जम्मू-काश्मीरच्या राजौरी सेक्टरमध्ये नियंत्रण रेषेजवळ बुधवारी पाकिस्तानी सैन्याने केलेल्या गोळीबारात भारतीय लष्कराचा ज्यूनियर अधिकारी (JCO) शहीद झाला. राजौरी सेक्टरच्या केरी भागात जेसीओ राजेश कुमार शहीद झाले अशी माहिती लष्कराकडून देण्यात आली. तीन दिवसांपूर्वी पाकिस्तानी सैन्याने अशाच प्रकारे शस्त्रसंधीचे उल्लंघन केले होते. त्यातही एक जेसीओ शहीद झाला होता. आज शस्त्रसंधी उल्लंघनात आणखी एक जेसीओ शहीद झाला. पाकिस्तानने छोटया शस्त्रास्त्रांनी गोळीबार केला. पाकिस्तानी सैन्याने नौशेरामधील कालसियन, खानगेर, भावनी येथील फॉरवर्ड पोस्टना लक्ष्य केले. जखमी झालेल्या जेसीओला तात्काळ रुग्णालयात हलवण्यात आले. पण तिथे त्याचा मृत्यू झाला.
