रोझ व्हॅली चिटफंड घोटाळ्याप्रकरणी सीबीआयने तृणमूल काँग्रेसचे नेते आणि खासदार सुदीप बंडोपाध्याय यांना मंगळवारी अटक केली. त्यामुळे संतापलेल्या तृणमूल काँग्रेसच्या विद्यार्थी संघटनेने भाजपच्या कार्यालायावर हल्ला केला. त्यामुळे सध्या कोलकातामध्ये तणाव आहे. तृणमूल काँग्रेसचे खासदार सुदीप बंडोपाध्याय यांची रोझ व्हॅली चिटफंड घोटाळ्याप्रकरणी सीबीआयने चौकशी केल्यानंतर मंगळवारी त्यांना अटक करण्यात आली. याच प्रकरणात तृणमूल काँग्रेसचेच खासदार तपस पाल यांनाही अटक करण्यात आली होती. ते सध्या पोलीस कोठडीत आहेत. अटक करण्यापूर्वी बंडोपाध्याय यांनी सीबीआयच्या चौकशीला सामोरे जाण्याची तयारी पत्रकारांशी बोलताना दाखवली होती. माझ्याविरोधात राजकीय कट रचल्याचा आरोपही त्यांनी केला होता. दरम्यान, रोझ व्हॅली चिटफंड घोटाळा प्रकरणाची अंमलबजावणी संचालनालयाकडूनही चौकशी करण्यात येत आहे.
