लंडन येथील प्रसिद्ध नॅचरल हिस्ट्री म्युझियमजवळ एका कारने काही लोकांना धडक दिली. या घटनेत अनेक लोक जखमी झाले आहेत. या प्रकरणी एकाला पोलिसांनी ताब्यात घेतले आहे. नेमके किती लोक जखमी झाले त्याचा आकडा अद्याप समोर आलेला नाही. 'एएनआय' या वृत्तसंस्थेने या संदर्भातले ट्विट केले आहे. तसेच 'नॅचरल हिस्ट्री म्युझियम'च्या अधिकृत ट्विटर हँडलनेही या संदर्भातले ट्विट केले आहेत. जगभरातील पर्यटक लंडनमध्ये पर्यटनासाठी येत असतात. त्यामुळे इथे कायमच वर्दळ असते. अशाच वर्दळीच्या ठिकाणी कारचालकाने फुटपाथवर गाडी चढवल्याचे तेथील प्रसारमाध्यमांनी म्हटले आहे. यानंतर तातडीने पोलिसांनी एका व्यक्तीला ताब्यात घेतले. गाडी फुटपाथवर चढवणे हा अपघात होता की घातपात याची चौकशी आता करण्यात येते आहे. A number of people have been injured #Exhibition Road #South Kensington — Metropolitan Police (@metpoliceuk) October 7, 2017 Car ploughs into pedestrians outside London's Natural History Museum: UK media — ANI (@ANI) A man has been detained by police. #Exhibition Road #South Kensington. — Metropolitan Police (@metpoliceuk) October 7, 2017 या घटनेनंतर नॅचरल हिस्ट्री म्युझियमजवळच्या इमारती तातडीने मोकळ्या करण्यात आल्या. तसेच या दिशेने जाणारे रस्तेही बंद करण्यात आले असेही तेथील प्रसारमाध्यमांनी म्हटले आहे. इंग्लंडमध्ये २०१७ या वर्षात चार ते पाचवेळा दहशतवादी हल्ले झाले आहेत. यातील तीन हल्ले हे गर्दीत कार घुसवून करण्यात आले होते. त्यामुळे शनिवारी घडलेली घटना हा अपघात होता की घातपात याचा पोलीस शोध घेत आहेत. सोमवारीच अमेरिकेतील लास वेगास या शहरात हल्लेखोरांनी एका कॅसिनोत सुरु असलेल्या संगीत समारंभात अंदाधुंद गोळीबार केल्याची घटना घडली होती. त्या घटनेत ५० पेक्षा जास्त जण ठार तर २०० पेक्षा जास्त लोक जखमी झाले होते. त्यानंतर 'आयसिस' या दहशतवादी संघटनेने या हल्ल्याची जबाबदारी स्वीकारल्याचेही समोर आले. या सगळ्या पार्श्वभूमीवर झालेल्या या घटनेचा तपास पोलिसांकडून करण्यात येतो आहे.