Chhattisgarh Election Results 2018: छत्तीसगडमध्ये भाजपाला हादरा बसण्याची चिन्हे आहेत. ९० जागा असलेल्या छत्तीसगडध्ये काँग्रेस ६८ तर भाजपा १२ जागांवर आघाडीवर आहे. तर अन्य पक्षांचे १० उमेदवार आघाडीवर आहेत. छत्तीसगडमध्ये गेल्या १५ वर्षांपासून भाजपाची सत्ता असून यंदा भाजपाला आव्हान देण्याचा काँग्रेसचा प्रयत्न होता. ‘चावलवाला बाबा’ म्हणून प्रसिद्ध असलेले मुख्यमंत्री रमणसिंग यांनी लागोपाठ चौथ्यांदा निवडणूक जिंकण्यासाठी सारी ताकद पणाला लावली होती. गेल्या वेळी भाजपाला ४१ टक्के तर काँग्रेसला ४०.३ तर बसपला चार टक्के मते मिळाली होती. मते काही प्रमाणात विरोधात गेली तरी भाजपाला सत्ता कायम राखणे कठीण जाऊ शकते, अशी शक्यता होती. निकालातून या शक्यतेवर शिक्कामोर्तब झाले. रमणसिंह यांचे सलग चौथ्यांदा सत्ता मिळवण्याचे स्वप्न अखेर भंगले आहे. अजित जोगी यांच्या नवीन पक्षामुळे काँग्रेसचे नुकसान होईल, असा दावा भाजपाचे नेते खासगीत करत होते. पण निकालातून अजित जोगी यांच्या पक्षाने काँग्रेसचे नुकसान झाले नाही, हे स्पष्ट झाले आहे.
