काँग्रेसच्या हंगामी अध्यक्षा सोनिया गांधी यांना दिल्लीतील सर गंगाराम हॉस्पिटलमध्ये दाखल करण्यात आले आहे. रुटीन चेकअपसाठी त्यांना रुग्णालयात दाखल करण्यात आले असल्याचे सुत्रांकडून कळते. दरम्यान, त्यांच्यासोबत प्रियंका गांधी-वढेरा आणि राहुल गांधी देखील आहेत. त्याचबरोबर काँग्रेसचे अनेक बडे नेतेही रुग्णालयात पोहोचत आहेत. एएनआयने यासंदर्भात वृत्त दिले आहे. #UPDATE Delhi: Congress interim president Sonia Gandhi is admitted to the hospital for a routine check-up. — ANI (@ANI) February 2, 2020 ७३ वर्षीय सोनिया गांधी गेल्या काही वर्षांपासून प्रकृती अस्वास्थ्यामुळे अधुनमधून रुग्णालयात दाखल होत असतात. आत्ताही त्या नेहमीच्या तपासणीसाठीच रुग्णालयात दाखल झाल्या असल्याचे सांगण्यात येत आहे. त्यामुळे राजकारणातला त्यांचा वावरही आता पूर्वीच्या तुलनेत कमी झाला आहे. निवडणूक प्राचारामध्येही त्या कमी प्रमाणात सहभागी होत आहेत. दरम्यान, लोकसभा निवडणुकीत काँग्रेसच्या मोठ्या पराभवानंतर राहुल गांधी यांनी काँग्रेसच्या अध्यक्षपदाचा राजीनामा दिला होता. त्यानंतर सोनिया गांधी यांना पुन्हा एकदा पक्षाच्या प्रमुखपदाची जबाबदारी आपल्या खांद्यावर घ्यावी लागली. सर्वात मोठ्या काळासाठी काँग्रेसचे अध्यक्षपद सांभाळण्याचा विक्रम त्यांच्या नावावर जमा आहे.