अवयव प्रत्यारोपणाचे प्रमाण मागच्या काही काळात देशात वाढले आहे. ब्रेन डेड किंवा मृत व्यक्तीचे अवयव दुसऱ्या एखाद्या रुग्णाला प्रत्यारोपित करुन जीवदान दिले जाते. यामध्ये अवयव एका ठिकाणहून दुसऱ्याठिकाणी नेण्याचे मोठे आव्हान असते. ठराविक कालावधीत अवयव संबंधित ठिकाणी पोहोचला तरच तो प्रत्यारोपणासाठी उपयुक्त ठरु शकतो. यासाठी सध्या अनेक ठिकाणी ग्रीन कॉरीडॉरची मदत घेण्यात येते. वेगळ्या राज्यात जायचे असेल तर हा अवयव विमानाने पाठवला जातो. तरीही विमानतळापासून रुग्णालयापर्यंत तो वेळेत पोहोचणे गरजेचे असते. दोन गावांमधील अंतर कमी असेल तर रस्त्यानेही अवयवाचे वहन केले जाते. त्यासाठी सामान्य वाहतुकीसाठी ठराविक रस्ते विशिष्ट कालावधीसाठी बंद करण्यात येतात. मात्र त्यामुळे असंख्य लोकांची गैरसोय होते. हीच गोष्ट लक्षात घेऊन केंद्रिय मंत्रालयाकडून लवकरच एक महत्त्वाचा निर्णय घेतला जाण्याची शक्यता आहे. केंद्रिय नागरी उड्डाण राज्यमंत्रालयाकडून याबाबतची घोषणा केली असून अवयव एकाठिकाणहून दुसऱ्या ठिकाणी पोहचवण्यासाठी ड्रोनचा वापर करण्याचा निर्णय विचाराधीन असल्याचे सांगितले आहे. त्यासाठी रुग्णालयांमध्ये ड्रोनपोर्टस बनवण्याची तयारी सुरु असल्याचे सांगण्यात आले आहे. यासाठी आवश्यक असणारे रजिस्ट्रेशन १ डिसेंबरपासून सुरु होणार असल्याचे सांगण्यात आले आहे. यासाठी १ महिन्यानंतर रुग्णालयांना लायसेन्स देण्याची प्रक्रिया केली सुरु केली जाणार आहे. असे झाल्यास रुग्णालयांना अवयव प्रत्यारोपणासाठी भेडसावणाऱ्या समस्या निश्चितच कमी होतील. मात्र ड्रोनच्या या निर्णयाबाबत नव्याने धोरण बनविण्यात येणार आहे. १५ जानेवारी रोजी जागतिक हवाई परिषदेमध्ये याबाबतचा विचार केला जाणार आहे. ड्रोनसाठी विशेष डिजिटल एयरस्पेसही बनवले जाईल. त्यानंतर ड्रोनच्या धोरणांमध्ये महत्त्वाचे बदल करण्यात येतील असेही सांगण्यात आले आहे. काही दिवसांतच सामान एका ठिकाणहून दुसऱ्या ठिकाणी पोहोचवण्यासाठी एक पायलट अनेक ड्रोन ऑपरेट करु शकेल. याबाबतही लवकरच निर्णय घेण्यात येणार असल्याचे उड्डाण मंत्रालयाकडून सांगण्यात आले आहे.
