उत्तर प्रदेशमधील कन्नौज येथे लखनऊ – आग्रा महामार्गावर आज (रविवार) सकाळी एका बसला भीषण अपघात झाला. या अपघातात घटनास्थळीच पाच जणांचा मृत्यू झाला. तर १८ जण गंभीर जखमी झाले आहेत. जवळपास ४० ते ५० जण या बसमध्ये प्रवास करत होते.

अपघातामधील जखमींनी कन्नौज येथील वैद्यकीय महाविद्यालय आणि इटावा येथील सैफई येथे दाखल करण्यात आले आहे. ही बस बिहारहून कामगारांना घेऊन दिल्लीकडे जात होती. दरम्यान, कन्नौजच्या सौरीख जवळ समोर उभ्या असलेल्या एका कारला भरधाव वेगात असलेली ही हबस धडकली. हा अपघात एवढा भीषण होता की दोन्ही वाहनं महामार्गावरून खाली येऊन पडली.

अपघातानंतर बसमधील प्रवाशांच्या आराडा-ओरडीचा व किंकाळ्यांचा आवाज ऐकताच, आसपासच्या नागरिकांनी घटनास्थळी मदतीसाठी धाव घेतली. नंतर काही वेळातच अपघाताची माहिती मिळताच पोलीस देखी घटनास्थळी दाखल झाले. यानंतर स्थानिक नागरिकांच्या मदतीने बसमध्ये अडकलेल्या जखमी प्रवाशांना बाहेर काढण्याचे काम सुरू झाले. रुग्णवाहिकेद्वारे जखमींना रुग्णालयात दाखल करण्यात आले.