सिंगापूरमध्ये राहणाऱ्या भारतीय वंशाच्या एका 59 वर्षीय परिचारिकेला (नर्स) राष्ट्रपती पुरस्काराने गौरवण्यात आलं आहे. करोना महामारीमध्ये रुग्णांची सेवा केल्याबद्दल परिचारिकांसाठी असलेल्या राष्ट्रपती पुरस्काराने त्यांचा सन्मान करण्यात आला आहे. सिंगापूरमध्ये करोना योद्धा म्हणून काम करणाऱ्या पाच परिचारिकांना हा पुरस्कार देण्यात आला असून यात कला नारायणसामी यांचाही समावेश आहे. सिंगापूरच्या आरोग्य मंत्रालयाकडून याबाबत मंगळवारी माहिती देण्यात आली. सिंगापूरचे राष्ट्रपती हलीम याकूब यांचं हस्ताक्षर असलेल्या प्रमाणपत्रासह एक ट्रॉफी आणि 10,000 एसजीडी (सिंगापूरचं चलन) देण्यात आले. कला नारायणसामी, 'वुडलँड्स हेल्थ कँम्पस'मध्ये नर्सिंगच्या उपसंचालक आहेत. त्यांना संक्रमण नियंत्रण प्रक्रियांचा वापर करण्यासाठी सन्मानित करण्यात आलं आहे. कला नारायणसामी यांनी वर्ष 2003 मध्ये सार्सच्या (SARS)संसर्गादरम्यान संक्रमण नियंत्रण प्रक्रियांबाबत शिक्षण घेतलं होतं. "नर्सिंग तुम्हाला भविष्यात निराश करणार नाही, तुम्हाला तुमच्या मेहनतीचं फळ नेहमी मिळेल, असं मी आमच्या क्षेत्रात येणाऱ्या सर्वांना नेहमी सांगेन. मी पुढील पिढीच्या नर्सना मार्गदर्शन करेन, अशी प्रतिक्रिया कला नारायणसामी यांनी पुरस्कार मिळाल्यानंतर दिली.