लोकशाहीच्या सदनामध्ये रिपब्लिकन नेत्यांनी कोणता पर्याय निवडला आहे हे आता दाखवून दिलं आहे. त्यांना याच मार्गाने जायचं असल्यास त्यांनी अशाच हिंसेला प्रोत्साहन देत रहावे किंवा त्यांनी सत्य स्वीकारुन या हिंसेची आग शांत करण्यासाठी पहिलं पाऊल उचलावं. ते अमेरिकेसोबत आहेत असं त्यांनी दाखवून द्यावं, असं आवाहनही ओबामा यांनी ट्रम्प समर्थक रिपब्लिकन पक्षाच्या नेत्यांना केलं आहे.

आणखी वाचा- अमेरिकेत ट्रम्प समर्थकांकडून हिंसाचार; जो बायडन म्हणाले…’हा विरोध नव्हे देशद्रोह’

आज राष्ट्राध्यक्षांच्या पक्षातील अनेकांना बळजबरीने बोलायला भाग पाडण्यात आलं हे पाहून मला दु:ख झालं. त्यांच्या या बोलण्यामधून रिपब्लिकन पक्षाच्या नेतृत्वाखाली देशाची काय अवस्था झालीय हे दिसून येत आहे. तसेच जॉर्जियासारख्या राज्यांमधील स्थानिक निवडणूक अधिकाऱ्यांनी मध्यस्थी करण्यास नकार देत प्रामाणिकपणे आपल्या पदाचा राजीनामा देण्याचा निर्णय घेतला, यावरुनही देशाच्या परिस्थितीचा अंदाज येतो. आपल्याला या अशा प्रामाणिक नेत्यांची सध्याच्या काळात आणि भविष्यातही गरज आहे. आपला देशाचा खरा राजकीय हेतू काय आहे हे लक्षात घेऊन तो पूर्वव्रत करण्यासाठी नवनिर्वाचित राष्ट्राध्यक्ष जो बायडेन काम करतील. आपण कोणत्या पक्षाचे आहोत याचा विचार न करता एक अमेरिकन म्हणून आपण जो यांना हे ध्येय साकार करण्यासाठी पाठिंबा दिला पाहिजे, असं भावनिक आवाहनही ओबामा यांनी केलं आहे.

आणखी वाचा- अध्यक्ष पदाची मुदत संपण्याआधीच ट्रम्प यांची गच्छंती?; हिंसाचार प्रकरणात ऐतिहासिक निर्णयाची शक्यता

बायडेन आणि मोदींनीही केलं ट्विट

अमेरिकेचे नवनिर्वाचित राष्ट्राध्यक्ष जो बायडेन यांनीही ट्विटरवरुन या हिंसेचा निषेध केला आहे. कॅपिटॉल बिल्डिंगबाहेर जो गोंधळ झाला तो अमेरिकेचा खरा चेहरा नाही. कायदा न मानणाऱ्या अशा लोकांची संख्या खूप कमी आहे. हा देशद्रोहाचा मार्ग असून तो थांबलाच पाहिजे, असं बायडेन म्हणाले आहेत. तसेच भारताचे पंतप्रधान नरेंद्र मोदी यांनाही सत्ता हस्तांतरण हे शांततापूर्ण मार्गेने झालं पाहिजे अशी प्रतिक्रिया दिली आहे. “वॉशिंग्टन डी. सी. मधील दंगल आणि हिंसाचाराच्या बातम्या पाहून अस्वस्थ झालो. शांततेच्या मार्गाने योग्य पद्धतीने सत्ता हस्तांतरण झालं पाहिजे. कायद्याच्या चौकटीत न बसणाऱ्या निषेधाच्या माध्यमातून लोकशाही प्रक्रियेला डाग लागता कामा नये,” असं ट्विट मोदींनी केलं आहे.