सेल्फी काढताना तळयात पडलेल्या दोन मुलींना वाचवताना तिघांचा बुडून मृत्यू झाला. मृतांमध्ये दोन तरुण आहेत. गुजरातच्या राजकोटमधील राया गावात मंगळवारी ही दुर्देवी घटना घडली. शक्ती सोलंकी, अजय परमार आणि त्रिभुवन मीरजा अशी मृतांची नावे आहेत. टाइम्स ऑफ इंडियाने हे वृत्त दिले आहे. राया गावातील परशुराम मंदिराशेजारी असलेल्या तळयाजवळ ही घटना घडली. शक्ती आणि अजय दोघेही पूजा व दर्शनासोबत तिथे आले होते. तळयाच्या काठाजवळ पूजा चौघांचा एकत्र सेल्फी काढत असताना तिचा तोल गेला व ती पाण्यात पडली. त्यावेळी पूजाने तिच्यासोबत दर्शनालाही पाण्यात खेचले. दोघींना बुडताना पाहून त्यांना वाचवण्यासाठी शक्ती आणि अजय दोघांनी पाण्यात उडी मारली. त्याचवेळी मीरजा सुद्धा तिथे होता. पाण्याबाहेर पडण्यासाठी चौघे जोरदार हातपाय मारत होते. मीरजाला पोहता येत असल्याने त्याने चौघांना वाचवण्यासाठी पाण्यात उडी मारली. त्याने दोन्ही मुलींना वाचवले. पण तो मुलांना वाचवू शकला नाही. अजय आणि शक्तीला वाचण्यासाठी मीरजा आणखी खोल पाण्यात गेला. पण तिथे तिघांचाही बुडून मृत्यू झाला. राजकोट अग्निशमन विभागाच्या अधिकाऱ्यांनी तिघांचे मृतदेह बाहेर काढले.
