विमानसेवा पुरवणारी कंपनी गो एअरने एका स्पेशल तिकीट सेलची घोषणा केली आहे. 'गो एअर मेगा मिलियन' असं या सेलला नाव देण्यात आलं आहे. याद्वारे कंपनीकडून देशांतर्गत प्रवासासाठी अवघ्या 899 रुपयांमध्ये तिकीट उपलब्ध करुन देण्यात येत आहे. 27 मे अर्थात आजपासून या सेलची सुरूवात होत आहे. 27 मे पासून तीन दिवस प्रवाशांना या तिकिटाचे बुकिंग करता येणार आहे. 10 लाख तिकीटांची विक्री कंपनीकडून करण्यात येणार आहे. या काळात बुकिंग केलेल्या प्रवाशांना 15 जून ते 31 डिसेंबर या काळात प्रवास करता येईल. प्रवाशांना तारीख, वेळ ठरविण्याचा अधिकार देण्यात आलेला आहे, असं कंपनीकडून स्पष्ट करण्यात आलं आहे. याशिवाय, 2 हजार 499 रुपयांपर्यंतचं तिकीट पेटीएमद्वारे खरेदी केल्यास 500 रुपयांची कॅशबॅक आणि मिंत्रा अॅपद्वारे 1 हजार 999 रुपयांपर्यंतचं तिकीट खरेदी करणाऱ्यांना 10 टक्के थेट सवलत अशा अनेक ऑफर्स आहेत. पेटीएम आणि मिंत्रा अॅपवरील ऑफर 31 ऑगस्टपर्यंत लागू असणार आहे.
