गुजरातच्या कारजान विधानसभा मतदारसंघात मतांसाठी पैसे वाटप केल्याच्या आरोपाप्रकरणी रिटर्निंग अधिकाऱ्याने चौकशीचे आदेश दिले आहेत. काँग्रेस उमेदवार किर्तीसिंह जाडेजा यांनी प्रतिस्पर्धी उमेदवार अक्षय पटेल यांच्यावर मतांसाठी पैसे वाटल्याचा आरोप केला आहे. अक्षय पटेल भाजपाच्या तिकिटावर निवडणूक लढवत आहेत. गुजरातमध्ये आज विधानसभेच्या आठ जागांसाठी पोटनिवडणूक होत आहे. यात वडोदऱ्यातील कारजान विधानसभा मतदारसंघाचाही समावेश आहे. जाडेजा यांचे निवडणूक एजंट उपेंद्रसिंह राणा यांनी या प्रकरणी तक्रार नोंदवली आहे. निवडणुकीआधी भाजपा कार्यकर्ते मतदारांना पैसे वाटप करत असल्याचे दोन व्हिडीओ यामध्ये आहेत. अक्षय पटेल आणि व्हिडीओ मध्ये दिसलेल्या भाजपा कार्यकर्त्यांविरोधात कारवाई करण्याची मागणी राणा यांनी तक्रारीत केली आहे. दोन बुथवरील मतदान रद्द करण्याची त्यांनी मागणी केली आहे. निवडणूक विभागाने तक्रारीची दखल घेतली असून आरोपाची चौकशी सुरु केली आहे, असे १४७ कारजान विधानसभा मतदारसंघाचे रिटर्निंग अधिकारी के.आर.पटेल यांनी इंडियन एक्स्प्रेसला सांगितले. "आम्ही चौकशी सुरु केली आहे. हा गंभीर विषय आहे. आज सकाळी आम्हाला तक्रार मिळाली" असे पटेल यांनी सांगितले.
