२२ वर्षांच्या विवाहितेवर ४० जणांनी सामूहिक बलात्कार केल्याची घटना उघडकीस आली आहे. या विवाहितेला एका गेस्ट हाऊसवर डांबून ठेवण्यात आले होते. आपल्यावर ४० जणांनी बलात्कार केल्याचा आरोप पीडितेने केला आहे. हरियाणातील पंचकुलात ही धक्कादायक घटना घडल्याची माहिती समोर आली आहे. १५ ते १८ जुलै या चार दिवसांमध्ये ही घटना घडल्याचे समोर आले आहे. चंदीगड पोलीस ठाण्यात या प्रकरणी गुन्हा नोंदवण्यात आला आहे. मोरानी हिल्स येथील एका गेस्ट हाऊसमध्ये पीडितेला डांबून ठेवण्यात आले होते अशीही माहिती पुढे आली आहे. ही मुलगी नोकरीच्या शोधात घराबाहेर पडली होती. चाळीस नराधमांपैकी एकाला पीडित महिला ओळखते. माझ्या नवऱ्याच्या मित्राने मला नोकरीला लावतो असे सांगितले त्याने मला गेस्ट हाऊसला नेले होते असे या महिलेने आपल्या कबुली जबाबात सांगितले आहे. या प्रकरणी गेस्ट हाऊसच्या दोन कर्मचाऱ्यांना पोलिसांनी अटक केली. त्यांचीही कसून चौकशी सुरु केली आहे. तसेच याप्रकरणी गुन्हा नोंद करण्यात आला असून नराधमांचा शोध सुरू आहे असेही पोलिसांनी सांगितले.