सिकंदराबादमध्ये हॉटेल म्हणून वापरात असलेली एक इमारत सोमवारी सकाळी कोसळली. या दुर्घटनेत १२ जणांचा बळी गेल्याची प्राथमिक माहिती मिळाली असून, १६ जण जखमी झाले आहेत. इमारतीच्या ढिगाऱयाखाली आणखी काही जण दबले असण्याची शक्यता वर्तविण्यात आली आहे.
मातीचा ढिगारा हटविण्यासाठी तातडीने मदतकार्य सुरू करण्यात आले असून, ढिगाऱयाखाली अडकलेल्या व्यक्तींना जवळच्या रुग्णालयात हलविण्यात येते आहे. इमारतीखाली सापडून सहा जणांचा बळी गेला असून, आतापर्यंत सर्व जखमींना रुग्णालयात दाखल करण्यात आले आहे, अशी माहिती हैदराबादचे पोलिस आयुक्त अनुराग शर्मा यांनी दिली.
सिकंदराबादमधील राष्ट्रपती रस्त्यावर असलेली ही दोन मजली इमारत सोमवारी सकाळी साडेसहाच्या सुमारास कोसळली. तिथे सिटी लाईट नावाचे हॉटेल होते.