News Flash

पाकिस्तानमध्ये १०० वर्ष जुन्या हिंदू मंदिरात अज्ञातांची तोडफोड! गुन्हा दाखल

रावळपिंडीमध्ये १०० वर्ष जुन्या हिंदू मंदिरात कही अज्ञातांनी तोडफोड केली आहे.

रावळपिंडीमधील हिंदू मंदिरात अज्ञातांची तोडफोड (Photo - AP)

पाकिस्तानच्या रावळपिंडी शहरामध्ये तब्बल १०० वर्ष जुन्या हिंदू मंदिरात काही अज्ञात हल्लेखोरांनी तोडफोड केल्याची घटना घडली आहे. स्थानिक पोलिसांनी या प्रकरणी अज्ञात हल्लेखोरांविरोधात गुन्हा दाखल केला असून त्याचा तपास सुरू केला आहे. इंडियन एक्सप्रेसनं दिलेल्या वृत्तानुसार रावळपिंडीच्या पुराना किला परिसरामध्ये हा प्रकार घडला आहे. या मंदिराच्या डागडुजीचं काम सुरू असताना ही तोडफोड करण्यात आली असून तोडफोड करणारे नक्की कोण होते, याचा शोध पोलीस घेत आहेत. शनिवारी संध्याकाळच्या सुमारास ही घटना घडली.

मंदिराच्या दरवाजांचं आणि पायऱ्यांचं नुकसान

शनिवारी संध्याकाळी ७.३० च्या सुमारास पुराना किला परिसरामध्ये असलेल्या या मंदिराजवळ १० ते १५ लोकांचा जमाव आला आणि त्यांनी मंदिराचं मुख्य द्वार आणि वरच्या मजल्यावरील इतर दरवाजांचं नुकसान केलं. तसेच, मंदिराच्या पायऱ्यांचं देखील त्यांनी नुकसान केल्याचं देखील पोलीस तक्रारीत म्हटलं आहे.

मंदिरात मूर्ती नव्हती

या तक्रारीनुसार मंदिरामध्ये गेल्या महिन्याभरापासून डागडुजीचं काम सुरू होतं. मंदिराच्या परिसरात काही प्रमाणात अतिक्रमण देखील झालं होतं. काही माफियांनी हा परिसर ताब्यात घेतला होता. २४ मार्च रोजी हे अतिक्रमण हटवण्यात आलं आणि डागडुजीचं काम सुरू झालं. मात्र, डागडुजीचं काम सुरू असल्यामुळे मंदीर परिसरात कोणतेही पूजा विधी होत नव्हते. तसेच, मंदिरात कोणतीही मूर्ती देखील नव्हती.

इव्हॅक्यू ट्रस्ट प्रॉपर्टी बोर्डचे सुरक्षा अधिकारी सैय्यद रझा अब्बास झैदी यांनी बन्नी पोलीस स्थानकात या प्रकाराविरोधात गुन्हा दाखल केला आहे. मंदिराचे व्यवस्थापक ओम प्रकाश यांनी दिलेल्या माहितीनुसार असा प्रकार घडल्याची माहिती मिळताच पोलीस घटनास्थळी दाखल झाले आणि त्यांनी परिस्थिती नियंत्रणात आणली.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on March 30, 2021 3:04 pm

Web Title: hundu temple in pakistan 100 year old vandalized by unknown person pmw 88
टॅग : Pakistan
Next Stories
1 Kerala Elections – “LDF ने सोन्याच्या काही तुकड्यांसाठी केरळला धोका दिला”
2 माता-बहिणींचा आदर करण्यासाठी नंदीग्राम निवडले, ममता बॅनर्जी यांचे स्पष्टीकरण
3 पीडितेने केली सत्र न्यायाधीशांची तक्रार मुख्य न्यायाधीशांकडे; म्हणाली सुनावणी दरम्यान त्यांचा व्यवहार असंवेदनशील
Just Now!
X