Updates Fani Cyclone: सर्वाधिक घातक असे भाकित वर्तविण्यात आलेले ‘फॅनी’ चक्रीवादळ ओदिशातील पुरीच्या किनारपट्टीला धडकले आहे. या चक्रीवादळाचा सामना करण्यासाठी प्रशासनाने पूर्ण तयारी केली आहे. दरम्यान या वादळामुळे तिघांचा बळी गेला आहे असे समजते आहे. ओदिशाच्या गोपालपूर, पुरी, चांदबाली, बालासोर आणि अन्य भागांमध्ये सोसायटयाच्या वाऱ्यासह मुसळधार पाऊस कोसळत आहे. आतापर्यंत १० लाख लोकांना सुरक्षित स्थळी हलवण्यात आले आहे. ओदिशाला धडकलेल्या शक्तीशाली फॅनी चक्रीवादाळामुळे वीज पुरवठयावर परिणाम झाला आहे. अनेक भागात वीज पुरवठा खंडीत झाला आहे. रस्ते ओस पडले आहेत. राज्याची राजधानी भुवनेश्वरसह कटक आणि भद्रक या शहरांमध्ये सोसाटयाच्या वाऱ्यासह मुसळधार पाऊस कोसळत आहे. गेल्या २० वर्षातील भारतात धडकलेले हे सर्वात भीषण चक्रीवादळ आहे.