इशरतजहाँ बनावट चकमक प्रकरणात आरोपी असलेल्या तीन पोलीस अधिकाऱ्यांनी या प्रकरणातून आपल्याला मुक्त करण्याची केलेली मागणी विशेष सीबीआय न्यायालयाने शुक्रवारी फेटाळून लावली. या तीन आरोपींमध्ये भारतीय पोलीस सेवेतील अधिकारी जी. एल. सिंघल, पोलीस उपअधीक्षक (निवृत्त) तरुण बारोट आणि उपनिरीक्षक अननू चौधरी यांचा समावेश आहे. या प्रकरणातील चौथे आरोपी निवृत्त पोलीस उपअधीक्षक जे. जी. परमार हे होते, त्यांनीही या प्रकरणातून आपल्याला मुक्त करावे अशी मागणी करणारी याचिका दाखल केली होती, मात्र काही दिवसांपूर्वीच परमार यांचे निधन झाले.
