भारतीय अवकाश संशोधन संस्था इस्रोमध्ये काम करणाऱ्या एका इंजिनिअरचा रस्ते अपघातात दुर्देवी मृत्यू झाला. पुगझेंती (४५) असे या इंजिनिअरचे नाव आहे. ते कांचीपुरम जिल्ह्यातील कविथंदलम गावाचे रहिवासी होते. तिरुअनंतपूरममधील इस्रोच्या केंद्रामध्ये ते काम करायचे. मंगळवारी दुपारी मोराई येथील आऊटर रिंग रोडवर झालेल्या अपघातात पुगझेंती यांचा मृत्यू झाला. त्यांची दुचाकी स्टेशनअरी पिकअप वाहनावर जाऊन धडकली. पुगझेंती यांनी हेल्मेट घालूनही त्यांच्या डोक्याला गंभीर मार लागला. अपघाताच्यावेळी पुगझेंती यांची दुचाकी प्रचंड वेगामध्ये होती असे पोलिसांनी सांगितले. अपघातानंतर पुगझेंती यांना स्थानिक नागरीक जवळच्या रुग्णालयात घेऊन गेले. तिथे डॉक्टरांनी तपासणी केल्यानंतर त्यांना मृत घोषित केले. पिकअप व्हॅनचा ड्रायव्हर रघु विरोधात वाहतूक पोलिसांनी गुन्हा नोंदवला आहे. गाडीमध्ये बिघाड झाल्यामुळे गाडी रस्त्याच्याकडेला उभी केली होती असे रघुने पोलिसांना सांगितले. इस्रोच्या अधिकाऱ्यांनी घटनास्थळाला भेट देऊन अपघाताची माहिती घेतली.
