जम्मू- काश्मीरमधील पुलवामा येथे सुरक्षा दलांनी २ दहशतवाद्यांचा खात्मा केला आहे. भाजपा नेत्याच्या सुरक्षा रक्षकावर दहशतवाद्यांनी हल्ला केला होता. सुरक्षा रक्षकाकडील बंदूक खेचून पळ काढण्याचा त्यांचा प्रयत्न होता. गुरुवारी पुलवामा जिल्ह्यातील बलहामा येथे बिलाल अहमद यांना दहशतवाद्यांनी लक्ष्य केले. त्यांच्याकडील बंदूक घेऊन पळ काढण्याचा दहशतवाद्यांचा प्रयत्न होता. मात्र बिलाल अहमद यांनी प्रतिकार केल्याने दहशतवाद्यांनी पळ काढला. यानंतर सुरक्षा दलांनी परिसरात शोधमोहीम राबवली. एका घरात हे तिन्ही दहशतवादी लपून बसले होते. शुक्रवारी सकाळी तीन पैकी २ दहशतवाद्यांना कंठस्नान घालण्यात यश आले. घटनास्थळी अजूनही चकमक सुरु असल्याचे समजते. मृत्यू झालेल्या दहशतवाद्यांकडून शस्त्रसाठा जप्त करण्यात आला आहे. दहशतवाद्यांच्या हल्ल्यात बिलाल अहमद जखमी झाले असून त्यांना रुग्णालयात दाखल करण्यात आले आहे. बिलाल अहमद हे भाजपा नेते अन्वर खान यांचे सुरक्षा रक्षक आहेत.
