केंद्रीय राखीव पोलीस दलाचे (सीआरपीएफ) जवान नेहमीच देशवासियांच्या सुरक्षेसाठी सतर्क असतात. पण दैनंदिन आयुष्यातही जवान इतरांच्या मदतीसाठी नेहमीच तत्पर असतात. अशीच एक घटना समोर आली आहे, जिथे जवानांनी जिवाची पर्वा न करता तरुणीचा जीव वाचवला आहे. जम्मू काश्मीरमधील बारामुल्ला येथे तैनात असणाऱ्या सीआरपीएफ जवानांसाठी सोमवारचा दिवस देखील नेहमीप्रमाणेच होता. पण अचानक समोर आलेल्या परिस्थितीत जवानांनी आपल्या जीवाची बाजी लावली आणि नदीत बुडणाऱ्या तरुणीचा जीव वाचवला.

सीआरपीएफ जवानांचा तरुणीला वाचवतानाचा व्हिडीओ समोर आला आहे. या व्हिडीओत जवान तरुणीला वाचवण्यासाठी नदीकाठावर दगडांवर धावताना दिसत आहेत. तरुणी पाण्यात वाहून जात असताना आरडाओरडा ऐकताच सर्व जवान तिच्या दिशेने धाव घेतात. यावेळी दोन जवान नदीत उडी घेत तरुणीला पकडण्याचा प्रयत्न करतात.

यावेळी नदीकिनारी असणारे इतर जवान मानवी साखळी तयार करतात आणि जवानांना तरुणीला घेऊन सुरक्षित बाहेर येण्यासाठी मदत करतात. हे सर्व जवान सीआरपीएफच्या १७६ बटालियनचे असून त्यांच्यावर कौतुकाचा वर्षाव होत आहे.