'किस ऑफ लव्ह' या मोहिमेचे आयोजक राहुल पसुपालन आणि रश्मी नायर यांना सेक्स रॅकेट चालवण्याच्या आरोपाखाली केरळ पोलिसांनी अटक केली आहे. सोशल मीडियाच्या माध्यमातून हे जोडपं सेक्स रॅकेट चालवत असल्याचा आरोप त्यांच्यावर ठेवण्यात आला आहे. सोशल मीडियाच्या माध्यमातून सेक्स रॅकेट चालवले जात असल्याची प्राथमिक माहिती मिळाल्यानंतर आरोपींना पकडण्यासाठी सायबर सेलने सापळा रचला होता. या सापळ्यात राहुल आणि रश्मी यांच्यासह आणखी आठ जणांना अटक करण्यात आल्याचे वृत्त एका इंग्रजी वृत्तपत्राने दिले आहे. स्वत:ला नैतिकतेचे संरक्षक म्हणवून घेणाऱयांच्या दादागिरीविरोधात गेल्या वर्षी राहुल आणि रश्मीने 'किस ऑफ लव्ह' मोहिम सुरू केली होती. त्याला प्रचंड प्रतिसाद मिळाला होता. दिल्लीसह अनेक शहरात ही मोहिम चालवण्यात आली होती. कोचीमधील एका कॅफेत एका जोडप्याने एकमेकांना किस केले होते. याविरोधात एका संघटनेच्या कार्यकर्त्यांनी कॅफेची तोडफोड केली होती. तसेच प्रेमी युगुलाला देखील मारहाण केली होती. यातूनच 'किस ऑफ लव्ह' या मोहिमेचा जन्म झाला. मोठ्या संख्येने तरुणाई यात सामील झाली. काही ठिकाणी आंदोलनेही झाली. फेसबुक पेज तयार करण्यात आले. या मोहिमेच्या माध्यमातून प्रेमी युगुलांना सार्वजनिक ठिकाणी उघडपणे चुंबन घेण्याचे आवाहन करण्यात आले होते.
