करोनाच्या पार्श्वभूमीवर कर्फ्यू जाहीर करण्यात आलेला असतानाही आपल्या मित्रांसोबत फिरणाऱ्या आरोग्यमंत्र्यांच्या मुलावर कारवाई करण्यात आल्याने महिला पोलीस कर्मचाऱ्याची बदली करण्यात आल्याचा प्रकार समोर आला आहे. सूरतमध्ये ही घटना घडली असून यानंतर मोठ्या प्रमाणात वाद निर्माण झाला आहे. पोलीस राजकीय दबाबाखाली काम करत असल्याची टीका होऊ लागली असून याप्रकरणी चौकशीचे आदेश देण्यात आले आहेत. पीटीआयने यासंबधी वृत्त दिलं आहे. राज्य आरोग्यमंत्री आणि आमदार कुमार कनानी यांचा मुलगा प्रकाश कनानी आणि त्याच्या मित्रांनी रोखण्यात आल्यामुळे कॉन्स्टेबल सुनीता यादव यांच्यासोबत वाद घालण्यास सुरुवात केली. घटनेचा व्हिडीओ रविवारी सोशल मीडियावर मोठ्या प्रमाणात व्हायरल झाला आहे. मिळालेल्या माहितीनुसार, लॉकडाउनच्या नियमांचं उल्लंघन करत असल्याने सुनीता यादव यांनी प्रकाश याच्या मित्रांना रोखलं. यानंतर त्यांनी प्रकाश याला फोन करुन बोलावून घेतलं. प्रकाश आपली कार घेऊन घटनास्थळी पोहोचला होता. यानंतर त्याने सुनीता यादव यांच्यासोबत वाद घालण्यास सुरुवात केली. “मी वर्षभर याच ठिकाणी तुला उभं राहण्यास भाग पाडू शकतो,” अशी धमकीही यावेळी त्याने दिली. घटनेचा व्हिडीओ व्हायरल झाल्यानंतर संताप व्यक्त होऊ लागला होता. One more video of cop speaking to Health Minister on phonepic.twitter.com/TZdN6OQOAy — Mohammed Zubair (@zoo_bear) July 12, 2020 यावेळी सुनीता यादव यांनीही आपण तुमची गुलाम नसल्याचं उत्तर दिलं. हा वाद समोर आल्यानंतर सुनीता यादव यांची पोलीस मुख्यालयात बदली करण्यात आली आहे. रविवारी प्रकाश आणि त्याच्या मित्रांना अटक करण्यात आली होती. पण नंतर त्यांनी जामिनावर सोडण्यात आलं. सुरतच्या पोलीस आयुक्तांनी याप्रकरणी चौकशीचे आदेश दिले आहेत. दरम्यान घटनेनंतर सुनीता यादव सुट्टीवर गेल्या असून यावर त्यांनी अद्याप कोणतंही भाष्य केलेलं नाही.