महाराष्ट्र, हरियाणा आणि झारखंडबरोबरच जम्मू-कश्मीरमध्ये देखील विधानसभा निवडणुका घेतल्या जाण्याची शक्यता वर्तवली जात आहे. महाराष्ट्र, झारखंड आणि हरियाणा या तिन्ही राज्यात ऑक्टोबरमध्ये विधानसभा निवडणुका होऊ शकतात. तर याचवेळी जम्मू-काश्मीरमध्येही विधानसभा निवडणूक होण्याची शक्यता आहे. इंडिया टुडेने यासंदर्भात वृत्त दिले आहे. या दृष्टीने भाजपाने जोरदार तयारी सुरू केल्याचे दिसत आहे. जम्मू-काश्मीरमधील राजकीय परिस्थितीबद्दल चर्चा करण्यासाठी आणि विधानसभा निवडणुकीसाठी पक्ष कितपत तयार आहे, याचा अंदाज घेण्यासाठी मंगळवारी भाजपाने जम्मू-काश्मीरमधील प्रमुख नेत्यांची बैठक बोलावली असल्याची माहिती आहे. विशेष म्हणजे या बैठकीस पंतप्रधान मोदी, गृह मंत्री अमित शहा, केंद्रीय मंत्री जितेंद्र सिंह, भाजपाचे सरचिटणीस राम माधव, जम्मू-काश्मीरचे प्रदेशाध्यक्ष रविंद्र रैना आणि राज्यातील अन्य वरिष्ठ नेते सहभागी होणार आहेत. अशातच जम्मू-काश्मीरमध्ये तब्बल दहा हजार सैनिक तैनात करण्यात आले आहेत, या मागचे कारण विधानसभा निवडणूकच असल्याचा अंदाज वर्तवला जात आहे. महाराष्ट्र विधानसभेचा कार्यकाळ ११ नोव्हेंबर, हरियाणा विधानसभेचा २ ऑक्टोबर व झारखंड विधानसभेचा ५ जानेवारी २०२० रोजी समाप्त होणार आहे. मात्र, वेळे अगोदरच निवडणुका घेतल्या जाण्याची दाट शक्यता वर्तवली जात आहे.
