ज्येष्ठ वकील मुकुल रोहतगी यांची भारताचे नवे अॅटर्नी जनरल (महान्यायवादी) म्हणून नियुक्ती करण्यात आली आहे. केंद्रात सत्ताबदल झाल्यामुळे जी. व्ही. वहानवटी यांनी आपल्या पदाचा राजीनामा दिला होता. त्यामुळे भाजपप्रणीत सरकारने रोहतगी यांची देशाचे १४ वे अॅटर्नी जनरल म्हणून नियुक्ती केली आहे. सरकारचा वरिष्ठ कायदा अधिकारीपदासाठी माझी निवड करण्यात आली असून आपणही त्याचा स्वीकार केला आहे. मात्र त्याची अधिकृत घोषणा करायची असल्याचे रोहतगी यांनी पत्रकारांशी बोलताना सांगितले. रोहतगी यांनी यापूर्वी एनडीए सरकारच्या काळात अतिरिक्त सॉलिसिटर जनरल म्हणून काम पाहिले होते. सरकारने आपल्यावर टाकलेल्या जबाबदारीची आपल्याला कल्पना आहे. त्यामुळे सरकार कोणत्याही किरकोळ तसेच चुकीच्या कायदेशीर कचाटय़ांत सापडू नये, या दृष्टीने प्रामाणिकपणे काम करणार असल्याचे रोहतगी यांनी सांगितले.