विमानात महिलेच्या शेजारी बसून पॉर्न क्लिप पाहणाऱ्या मुंबईतील एका व्यावसायिकाला फक्त इशारा देऊन सोडण्यात आले. सीआयएसएफने त्याला पकडून पोलिसांच्या ताब्यात दिले होते. शनिवारी रात्री मुंबईहून चेन्नईला जाणाऱ्या विमानात ही घटना घडली. रात्री अकराच्या सुमारास या विमानाने मुंबई विमानतळावरुन उड्डाण केल्यानंतर रात्री १२.५० च्या सुमारास हे विमान चेन्नईत पोहोचले. मादीपाक्कम येथे राहणारी महिला तिच्या मुलासोबत विमानाने प्रवास करत होती. नवऱ्याला भेटून ती चेन्नईला परतत असताना ही घटना घडली. शेजारच्या सीटवर बसलेला हा माणूस तिला दिसेल अशा पद्धतीने पॉर्न क्लिप पाहत होता असे या महिलेने पोलिसांना सांगितले. महिलेने विमानाच्या केबिन क्रू कडे याची तक्रार केली. क्रू मेंबर्सनी त्या माणसाला दुसऱ्या आसनावर बसायला सांगितले. पण त्याने नकार दिला. त्यानंतर फ्लाईट कॅप्टन तिथे आला. त्याने महिलेला दुसरी जागा करुन दिली. विमानाच्या कॅप्टनने चेन्नईच्या एटीसीला आणि सीआयएसएफला या घटनेची माहिती दिली. सीआयएसएफने पॉर्न पाहणाऱ्या प्रवाशाला ताब्यात घेऊन एअरपोर्ट पोलिसांकडे दिले. महिलेने आरोपीविरोधात लिखित तक्रार दाखल करायला नकार दिला व पोलिसांना त्याला इशारा देऊन सोडण्यास सांगितले. त्यामुळे त्याची सुटका करावी लागली. त्या व्यावसायिकाने सुद्धा आपल्या वागण्याबद्दल माफी मागितली असे पोलिसांनी सांगितले.
