शिवसेनाप्रमुख बाळासाहेब ठाकरे यांच्या तृतीय स्मृतिदिनानिमित्त पंतप्रधान नरेंद्र मोदी यांनी मंगळवारी ट्विटरच्या माध्यमातून त्यांना श्रद्धांजली वाहिली. ट्विटरवर मंगळवारी सकाळी केलेल्या ट्विटमध्ये मोदी यांनी म्हटले आहे की, सर्वसामान्यांच्या कल्याणासाठी बाळासाहेब ठाकरे कटिबद्ध होते. अनेक कार्यकर्त्यांना त्यांच्याबद्दल आदर होता. त्यांच्या स्मृतिदिनानिमित्त त्यांना विनम्र अभिवादन.


मुंबईतील शिवाजी पार्कवरील स्मृतिस्थळावरही हजारो शिवसैनिकांनी मंगळवारी सकाळपासूनच बाळासाहेबांना श्रद्धांजली वाहण्यासाठी गर्दी केली आहे. शिवसेना पक्षप्रमुख उद्धव ठाकरे यांनी सहकुटुंब येऊन या ठिकाणी बाळासाहेबांना श्रद्धांजली वाहिली. शिवसेनेचे नेते, उपनेते, खासदार, आमदार, वेगवेगळ्या ठिकाणचे नगरसेवक यावेळी स्मृतिस्थळावर उपस्थित होते.