काँग्रेसचे नेते नवज्योत सिंग सिद्धू यांची पत्नी नवज्योत कौर यांनी मंगळवारी काँग्रेसला सोडचिठ्ठी दिली. त्यांना यावर्षी पंजाबमधून लोकसभा निवडणूक लढवायची होती. पण त्यांना पक्षाने तिकीट नाकारल्यामुळे त्या नाराज होत्या. नवज्योत कौर भाजपाच्या माजी आमदार आहेत. त्या अमृतसर पूर्वमधून आमदार होत्या. त्यांना चंदीगडमधून निवडणूक लढवायची होती. माझा आता कुठल्याही राजकीय पक्षाशी संबंध नाही. आता फक्त मी एक समाजसेवक म्हणून कार्य करेन. त्या अकाली-भाजपा सरकारमध्ये आरोग्य मंत्री होत्या. जुलै महिन्यात नवज्योत सिंग सिद्धू यांनी आपल्या समर्थकांची भेट घेतली व काँग्रेसमध्येच राहणार असल्याचे त्यांना सांगितले होते. सिद्धूने त्यांच्या निवासस्थानी समर्थक नगरसेवकांची भेट घेतली होती. पंजाब सरकारमधून राजीनामा देत असलो तरी पक्षाचा राजीनामा देणार नाही असे सिद्धूने त्याचवेळी स्पष्ट केले होते. सिद्धू यांनी कार्यकर्त्यांना पक्षासाठी काम करण्यासाठी प्रोत्साहन दिले होते असे त्या बैठकीला उपस्थित असणाऱ्या नगरसेविका मोनिका शर्मा यांनी सांगितले होते.
