पोलिओ हा जुना रोग असला तरी अजून त्याचे पूर्ण उच्चाटन झालेले नाही. या रोगावर आता नवीन लस तयार करण्यात येत असून त्यात बऱ्याच अंशी यश आले आहे.पोलिओवरची ही लस ब्रिटन व अमेरिकेचे वैज्ञानिक तयार करीत असून, ती कृत्रिम स्वरूपाची आहे. लीड्स विद्यापीठात त्याबाबत प्रयोग चालू आहेत. ही लस चटकन परिणाम करणारी, उत्पादनास सोपी व सुरक्षित आहे.ऑक्सफर्ड विद्यापीठातील रचनात्मक जीवशास्त्राचे प्राध्यापक डेव्ह स्टुअर्ट यांनी सांगितले, की विविध प्रकारची तंत्रे वापरून ही लस तयार करण्यात येत आहे. हा विषाणू स्थिर कसा होतो हे पाहण्यासाठी काही स्फटिकीय रचनांचा अभ्यास केला जात असून, त्यात इलेक्ट्रॉन मायक्रोस्कोपने घेतलेल्या प्रतिमांचा वापर केला आहे. या कृत्रिम लसीचा प्रभाव मानवी प्रतिकारशक्तीवर चांगला होतो. पोलिओमायलेटिस म्हणजे पोलिओचे जगातून उच्चाटन झाले असले तरी त्याचे लसीकरण वेळोवेळी महत्त्वाचे असते, कारण अज्ञात स्रोतातून हा विषाणू पुन्हा येऊ शकतो. आताच्या या नवीन पण कृत्रिम लसीमुळे पोलिओ लसीकरण वेळोवेळी करण्याची गरज भासणार नाही असेही सांगण्यात आले. या पोलिओ लसीचे प्राथमिक निष्कर्ष आशादायी असून, त्यात कृत्रिम कणांचा वापर केला जात आहे. त्यात विषाणू स्थिरीकरणाचा वापर करण्यात आला आहे असे स्टुअर्ट यांनी अमेरिकन असोसिएशन फॉर द अॅडव्हान्समेंट ऑफ सायन्सच्या सॅनजोस येथे झालेल्या बैठकीत सांगितले.नवीन पोलिओ लस*लसीमध्ये कृत्रिम कणांचा वापर.*विषाणू स्थिरीकरणाच्या अभ्यासाने लस शक्य.*प्रतिकारशक्तीवर चांगला परिणाम.*पोलिओचे लसीकरण पुन:पुन्हा करण्याची गरज नाही.*पोलिओ विषाणूमुळे होतो.
