News Flash

जीएसटीतून मिळणाऱ्या उत्पन्नात ऑक्टोबरमध्ये १० टक्क्यांनी घट

पहिल्यांदाच उत्पन्न ९० हजार कोटी रुपयांच्या खाली

प्रातिनिधिक छायाचित्र

वस्तू आणि सेवा करातून मिळणाऱ्या महसूलात जवळपास १० टक्क्यांनी घट झाली आहे. सप्टेंबरमध्ये सरकारला जीएसटीमधून ९२ हजार कोटी रुपयांचे उत्पन्न मिळाले होते. मात्र ऑक्टोबरमध्ये सरकारला ८३ हजार ३४६ कोटी रुपयांचे उत्पन्न मिळाले आहे. जुलै महिन्यापासून जीएसटी लागू झाल्यानंतर सरकारला पहिल्या तीन महिन्यांमध्ये ९० हजार कोटी रुपयांहून अधिक महसूल मिळाला होता. मात्र ऑक्टोबरमध्ये पहिल्यांदाच सरकारच्या महसुली उत्पन्नात घट झाली आहे.

व्यापारी आणि दुकानदार स्वत:हून जाहीर केलेल्या उत्पन्नावर करभरणा करत असल्याने जीएसटी घटल्याचे अर्थ मंत्रालयाने सांगितले. यासोबतच करांमध्ये कपात करण्यात आल्याचा परिणामही जीएसटीवर झाल्याचे अर्थ मंत्रालयाकडून जारी करण्यात आलेल्या पत्रकात नमूद करण्यात आले आहे. सुरुवातीच्या तीन महिन्यांमध्ये एकीकृत जीएसटी लागू होत असल्यानेही सरकारला जास्त उत्पन्न मिळाले होते. या तीन महिन्यांमध्ये राज्य आणि केंद्राचा जीएसटी एकत्रितपणे लागू होत होता.

‘सध्याच्या घडीला देशातील जीएसटी अंतर्गत करभरणा करणाऱ्यांची संख्या ९५.९ लाख इतकी आहे. यातील १५.१ लाख कम्पोजिशन डिलर्स असून त्यांना दर तीन महिन्यांनी कर भरावा लागतो. ऑक्टोबर ते २६ नोव्हेंबरपर्यंत ५०.१ लाख व्यापारी आणि दुकानदारांनी जीएसटी भरला आहे,’ अशी माहिती अर्थ मंत्रालयाने दिली. ‘ऑक्टोबरमधील सरकारचे उत्पन्न घटले असले, तरी त्याबद्दल फार चिंता करण्याचे कारण नाही. निर्यातदारांना रिफंड आणि उद्योजकांना क्रेडिट देण्यात आल्याने उत्पन्नात घट झाल्याचे दिसत आहे. याशिवाय या महिन्यात करांमध्येही कपात करण्यात आल्याने महसुली उत्पन्न कमी झाले,’ असे विश्लेषण प्राईसवॉटरहाऊसच्या प्रतीक जैन यांनी केले.

एक जुलैपासून देशभरात जीएसटीची अंमलबजावणी सुरु झाली. या महिन्यात सरकारला जीएसटीमधून ९५ हजार कोटी रुपयांचे उत्पन्न मिळाले होते. तर ऑगस्टमध्ये महसुली उत्पन्नात ४ हजारांची घट पाहायला मिळाली. या महिन्यात सरकारला ९१ हजार कोटींचे उत्पन्न मिळाले. यानंतर सप्टेंबरमध्ये सरकारला ९२ हजार १५० कोटी रुपयांचे उत्पन्न मिळाले होते. तर ऑक्टोबरमध्ये सरकारचे उत्पन्न जवळपास १० टक्क्यांनी घटले आहे. जीएसटी लागू झाल्यापासून पहिल्यांदाच सरकारचे उत्पन्न ९० हजार कोटी रुपयांच्या खाली आले आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on November 28, 2017 8:01 am

Web Title: october gst collections down to rs 83346 crore
Next Stories
1 लालूप्रसाद यादव यांच्या सुरक्षेत घट
2 उत्तर प्रदेश गुन्हेगारीमुक्त झाल्याने गुंतवणूकदार परतू लागले – आदित्यनाथ
3 न्या. ब्रिजगोपाल लोया यांच्या मृत्यूची चौकशी करा; हायकोर्टात याचिका
Just Now!
X