पर्युषण काळात मांसविक्रीवर बंदी घालण्याच्या स्थानिक स्वराज्य संस्थांच्या निर्णयाचे मुंबई व नवी मुंबईत तीव्र पडसाद उमटले असतानाच मांस आणि गोमांसाच्या विक्रीवर बंदीचे लोण गुरुवारी राजस्थान, जम्मू-काश्मीर व अहमदाबादमध्येही पसरले. १७ सप्टेंबरला पर्युषणपर्व, १८ सप्टेंबरला जैनांचा सण ‘संवत्सरी’ आणि २७ सप्टेंबर रोजी अनंत चतुर्दशी या सणांनिमित्त मांस व मासे यांच्या विक्रीला बंदी घालणारा आदेश राजस्थान सरकारने जारी केला. जम्मू-काश्मीरमध्ये उच्च न्यायालयाने गोमांसाच्या विक्रीवर बंदी घातली. यामुळे स्थानिक रहिवाशांमध्ये, तसेच जमात-ए-इस्लामी व फुटीरवादी हुर्रियत कॉन्फरन्स यांसारख्या संघटनांमध्ये तीव्र प्रतिक्रिया उमटली. या आदेशाला आव्हान देणार असल्याचे हायकोर्ट बार असोसिएशनने म्हटले आहे. अहमदाबादमध्येही आठवडाभर गायी व बकरे यांसारख्या प्राण्यांच्या हत्येवर बंदी घालणारा आदेश पोलीस आयुक्त शिवानंद झा यांनी काढला.
