तुम्ही पाच मिनिट एका जागी उभं राहून मोदींना सन्मानित करा अशा प्रकारची एक मोहीम सुरू केल्याचं माझ्या ध्यानात आणून दिलं आहे. जर माझ्यावर प्रेम असेल तर हे करण्यापेक्षा करोना व्हायरसचा प्रादुर्भाव असे पर्यंत त्यांनी एका कुटुंबाची जबाबदारी घ्यावी, असं आवाहन पंतप्रधान नरेंद्र मोदी यांनी केलं आहे. त्यांनी यासंदर्भात ट्विट करून माहिती दिली आहे. एका जागी पाच मिनिटं उभं राहून मोदींना सन्मानित करा अशी मोहीम सुरू असल्याचं माझ्या ध्यानात आणून दिलं आहे. याकडे पाहिलं तर सुरूवातीला मोदींना वादात ढकलण्यासाठी हे सुरू केलं आहे असं वाटतं. यामागे कोणाचा चांगला हेतूही असू शकतो. तर त्यांना माझीही एक विनंती आहे. जर कोणी मोदींना सन्मानित करू इच्छित आहे आणि माझ्यावर इतकं प्रेम आहे तर करोना व्हायरसचा प्रादुर्भाव असेपर्यंत एका गरीब कुटुंबाची जबाबदारी स्वीकारावी. माझ्यासाठी यापेक्षा मोठा कोणताही सन्मान नसेल, असं मोदी म्हणाले. त्यांनी ट्विट करून याबाबत माहिती दिली. मेरे ध्यान में लाया गया है कि कुछ लोग यह मुहिम चला रहे हैं कि 5 मिनट खड़े रहकर मोदी को सम्मानित किया जाए। पहली नजर में तो यह मोदी को विवादों में घसीटने की कोई खुराफात लगती है। — Narendra Modi (@narendramodi) April 8, 2020 हो सकता है कि यह किसी की सदिच्छा हो, तो भी मेरा आग्रह है कि यदि सचमुच में आपके मन में इतना प्यार है और मोदी को सम्मानित ही करना है तो एक गरीब परिवार की जिम्मेदारी कम से कम तब तक उठाइए, जब तक कोरोना वायरस का संकट है। मेरे लिए इससे बड़ा सम्मान कोई हो ही नहीं सकता। — Narendra Modi (@narendramodi) April 8, 2020 सध्या देशभरात करोनानं थैमान घातलं आहे. त्यातच खबरदारीचा उपाय म्हणून देशात २१ दिवसांचं लॉकडाउन जाहीर करण्यात आलं आहे. त्यामुळे हातावर पोट असलेल्या गरीब कुटुंबांना मोठ्या समस्यांना सामोरं जावं लागत आहे. दरम्यान, भारतात गेल्या २४ तासात करोनाचे ७०० पेक्षा अधिक नवे रुग्ण आढळले असून ३५ मृत्यूंची नोंद झाली आहे. भारतातील करोनाबाधितांची संख्या ५१९४ च्या वर पोहोचली आहे. तर मृतांची संख्या १४९ झाली आहे. ४०१ जणांवर उपचार करुन त्यांना घरी पाठवण्यात आलं आहे.