भरधाव वेगाने मोटार हाकून तिघाजणांचा जीव घेणाऱ्या राजस्थानमधील आमदारपुत्राने प्रमाणापेक्षा पाचपट अधिक मद्यप्राशन केल्याचे पोलीस अहवालात स्पष्ट झाले आहे. त्याला एक आठवडय़ाची पोलीस कोठडी देण्यात आली. सिद्धार्थ महारिया हा राजस्थानातील फतेहपूरचे अपक्ष आमदार नंदकिशोर महारिया यांचा पुत्र आहे. शनिवारी त्याने आपली आलिशान बीएमडब्ल्यू मोटार भरधाव वेगाने हाकत एक ऑटोरिक्षा व पोलिसांच्या वाहनाला जबरदस्त धडक दिली. यात तीनजण ठार, तर पाचजण जखमी झाले. पोलिसांनी अपघातानंतर लगेच घेतलेल्या चाचणीत सिद्धार्थने प्रमाणापेक्षा पाचपट अधिक मद्यप्राशन केल्याचे आढळले असून, अपघाताच्या वेळी तो ताशी सुमारे १०० किलोमीटर वेगाने मोटार चालवत होता असेही उघड झाले आहे. या अपघातात रिक्षातील ४ जणांपैकी तिघांचा मृत्यू झाला, तर एकजण जखमी झाला. पोलिसांच्या वाहनातील एका उपनिरीक्षकासह चार पोलीसही जखमी झाले.
