राजस्थानमधील जोधपूरजवळ गुरुवारी सकाळी हवाई दलाचे मिग- २३ हे लढाऊ विमान कोसळल्याची घटना घडली. या दुर्घटनेविषयी अद्याप हवाई दलाने प्रतिक्रिया दिलेली नसून विमान कोसळण्याचे कारणही अजून अस्पष्ट आहे. विमानातील दोन्ही वैमानिक सुखरुप असून वेळीच विमानातून बाहेर पडल्याने दोघेही बचावले आहेत. जोधपूरमधील बालेसार येथे हवाई दलाचे मिग-२३ हे लढाऊ विमान प्रशिक्षणादरम्यान कोसळले. गेल्या आठवड्याभरात हवाई दलाला बसलेला हा दुसरा हादरा आहे. यापूर्वी ४ जुलैरोजी अरुणाचल प्रदेशमधील पापूम परे येथे बचावकार्यासाठी गेलेले हवाई दलाचे हेलिकॉप्टर कोसळले होते. बुधवारी या हेलिकॉप्टरचे अवशेष सापडले होते. या दुर्घटनेत तीन जणांचा मृत्यू झाला होता. दरम्यान, गुरुवारी सकाळी कोसळेले मिग २३ विमानाच्या दुर्घटनेचे कारण अजून अस्पष्ट आहे. या दुर्घटनेची चौकशी सुरु असल्याचे समजते.
