केंद्रीय क्रिडा मंत्री राज्यवर्धन सिंह राठोड यांनी फिटनेसचं महत्व पटवून देण्यासाठी एका वेगळ्या पद्धतीने सोशल मीडियाची मदत घेतली आहे. राज्यवर्धन सिंह राठोड यांनी व्यायाम करत असतानाचा एक व्हिडीओ सोशल मीडियावर शेअर केला आहे. 'हम फिट तो इंडिया फिट' हा फिटनेस मंत्र देत राज्यवर्धन सिंह राठोड यांनी विराट कोहली, सायना नेहवाल आणि ह्रतिक रोशनलाही या मोहिमेत सामील होण्याचं आवाहन केलं आहे. गतवर्षी क्रिडा मंत्रालय हाती घेतलेल्या राज्यवर्धन सिंह राठोड यांनी एक व्हिडीओ शूट केला आहे. व्हिडीओत ते त्यांच्या कार्यालयात बसल्याचं दिसत आहे. यावेळी बोलताना आपण पंतप्रधान नरेंद्र मोदींच्या ऊर्जेमुळे प्रभावित होत असल्याचं ते सांगत आहे. पंतप्रधान नरेंद्र मोदी दिवस-रात्र काम करत असतात आणि त्यांची इच्छा आहे की, संपुर्ण भारताने फिट राहावं. आपल्या कामात व्यायामाचा समावेश करण्याचं आवाहन करत हा फिटनेस मंत्र शेअर करण्यासही ते सांगत आहेत. राज्यवर्धन सिंह राठोड यांनी लोकांना व्यायाम करत असतानाचा आपला व्हिडीओ शूट करुन सोशल मीडियावर पोस्ट करण्यास सांगितलं आहे. या व्हिडीओत आपल्या कार्यालयात ते पुश अप्स मारताना दिसत आहेत. ट्विट करताना त्यांनी या चॅलेंजसाठी ह्रतिक रोशन, विराट कोहली आणि सायना नेहवालला टॅग केलं आहे. #HumFitTohIndiaFit Post pictures and videos of how you keep yourself fit and send a #FitnessChallenge to your friends on social media. Here's my video and I challenge @iHrithik, @imVkohli & @NSaina to join in pic.twitter.com/pYhRY1lNEm— Rajyavardhan Rathore (@Ra_THORe) May 22, 2018 सोशल मीडियावर राज्यवर्धन सिंह राठोड यांच्या या मोहिमेचं कौतुक होत आहे. राज्यवर्धन सिंह राठोड स्वत: एक खेळाडू राहिले आहेत. त्यांनी देशासाठी ऑलिम्पिक मेडलही जिंकलं आहे. त्यामुळे त्यांच्या या मोहिमेचा वेगळा प्रभाव पडण्याची शक्यता आहे.