भारताची 'फुल'राणी सायना नेहवालने पंतप्रधान नरेंद्र मोदींना त्यांच्या वाढदिवसानिमित्त अनोखी भेट दिली. जागतिक बॅडमिंटन स्पर्धेत सायनाने वापरलेले रॅकेट तिने नरेंद्र मोदींना भेट म्हणून दिले. जागतिक बॅडमिंटन स्पर्धेत सायनाने रौप्य पदकाची कमाई केली होती. या स्पर्धेत रौप्य पदक मिळवणारी सायना पहिली भारतीय बॅडमिंटनपटू ठरली होती. मोदींचा आज ६५ वा वाढदिवस आहे. यानिमित्ताने सायनाने बुधवारी नवी दिल्लीत नरेंद्र मोदींची भेट घेतली आणि त्यांना वाढदिवसाच्या शुभेच्छा दिल्या. सायनाने दिलेल्या अनोख्या गिफ्टबद्दल मोदींनी आपल्या ट्विटर अकाऊंटवर तिचे आभार व्यक्त केले. तर, पंतप्रधानांच्या भेटीमुळे आणि त्यांना माझे रॅकेट भेट म्हणून देऊ शकले याचा आनंद सायनाने व्यक्त केला आहे. मोदींच्या भेटीवेळी सायनासोबत तिचे वडिल हरवीर नेहवाल आणि आयओएस स्पोर्ट्सचे मुख्य कार्यकारी अधिकारी नीरव तोमर देखील उपस्थित होते.
