भाजपचे पंतप्रधानपदाचे उमेदवार नरेंद्र मोदी यांची लवकरच जम्मूमधील एमएएम स्टेडियमवर ‘ललकार सभा’ होत असून, त्यासाठी चोख सुरक्षा व्यवस्था करण्यात आली आहे. पोलिसांनी स्टेडियमचा ताबा घेतला असून, गुरुवारी तिथे सर्वसामान्यांना प्रवेशबंदी करण्यात आली होती.नरेंद्र मोदी दहशतवाद्यांच्या रडारवर असल्याने त्यांच्या सभेसाठी कडक सुरक्षा व्यवस्था करण्याचा निर्णय घेण्यात आला आहे. त्यादृष्टीने शहरात सर्वत्र चोख पोलीस बंदोबस्त करण्यात आला असून, शहरात ये-जा करणाऱ्या सर्व वाहनांची तपासणी करण्यात येत आहे. शहरात महत्त्वाच्या ठिकाणी पोलिसांनी संचारबंदी लागू केली आहे. जम्मू-काश्मीरचे पोलीस महासंचालक अशोक प्रसाद यांनी घटनास्थळाची पाहणी करून सुरक्षा व्यवस्थेचा आढावा घेतला. स्टेडियममधील व्यासपीठ पोलिसांच्या उपस्थित बांधण्यात आले असून, त्याची पाहणीही प्रसाद यांनी केली. एमएएम स्टेडियमवर सभेच्या दिवसापर्यंत सामान्यांना प्रवेशबंदी करण्यात आली आहे. बॉम्बशोधक पथकाकडून स्टेडियमची पाहणी करण्यात येत आहे.
