आम आदमी पक्षाला रामराम ठोकलेल्या शाझिया इल्मी यांना 'आप'चे निमंत्रक अरविंद केजरीवाल यांच्या विरोधात निवडणूक आखाड्यात उतरविण्याचा विचार भाजप करत असल्याचे म्हटले जात आहे. सुत्रांनी दिलेल्या माहितीनुसार, दिल्लीत येत्या ७ फेब्रुवारी रोजी होणाऱया विधानसभा निवडणुकांमध्ये आम आदमी पक्षाला दणका देण्यासाठी केजरीवाल यांना आव्हान देण्यासाठी भाजप दमदार चेहऱयाच्या शोधात आहे. यामध्ये शाझिया इल्मी यांचे नाव आघाडीवर असल्याचे बोलले जात आहे. इतकेच नव्हे तर, शाझिया इल्मी यांनीही केजरीवाल यांच्या विरोधात निवडणूक लढविण्याची तयारी सुरू केली असल्याची खात्रीलायक माहिती समोर आली आहे. हे दोघेजण एकमेकांविरोधात उभे ठाकल्यास नवी दिल्ली मतदार संघातील ही सर्वात लक्षवेधी लढत ठरणार आहे. इल्मी यांनी गेल्या वर्षी 'आप'मध्ये लोकशाहीचा अभाव असल्याचे सांगत राजीनामा दिला होता. इल्मी यांना गेल्या विधानसभा निवडणुकीत आणि लोकसभा निवडणुकीत पराभव स्वीकारावा लागला होता. निवडणूक आयोगाने सोमवारी दिल्ली विधानसभा निवडणुकांच्या तारखा जाहीर केल्यानंतर येथील राजकीय घडामोडींना वेग आला आहे.
