पुणे : महापालिका निवडणुका महाविकास आघाडीने एकत्रितपणे लढवाव्यात, अशी शिवसेनेची भूमिका आहे. मात्र, महाआघाडी होऊ शकली नाही तर स्वबळावर लढणे अशा दोन्ही पर्यायांची तयारी ठेवली असल्याचे शिवसेना खासदार संजय राऊत यांनी शनिवारी स्पष्ट केले. महापालिका निवडणुकांमध्ये मुंबई, ठाणे, औरंगाबाद आणि नाशिकमध्ये शिवसेनेचा भगवा फडकेल. पुण्यामध्ये आम्ही किंग किंवा किंगमेकर यापैकी एका भूमिकेत असू, असे राऊत म्हणाले. शिवसेना पदाधिकाऱ्यांशी चर्चा केल्यानंतर राऊत यांनी पत्रकारांशी संवाद साधला. महाविकास आघाडी सरकार चांगले काम करत आहे, असेही ते म्हणाले.
