दोन कुटुंबांतील वाद विकोपाला गेला अन् त्यामध्ये दोन जणांनी एकाच कुटुंबातील सहा जणांची हत्या केली. मध्य प्रदेशमधील मंडला जिल्ह्यात ही धक्कादायक घटना घडली आहे. दोन जणांनी तलवार आणि कुऱ्हाडीने सपासप वार करत एका कुटुंबातील सहा जणांची हत्या केली. या घटनेत इतर काही जण जखमी झाले आहेत. पोलिसांनी दोन्ही आरोपींना अटक केली आहे.

मंडला जिल्ह्यातील मनेरी गावांत काल सायंकाळी ही घटना घडली. घटनास्थळावर पोलिसांनी तात्काळ धाव घेतली. पोलिस अधिक्षक विक्रमसिंह कुशवाह म्हणाले की, ‘आतापर्यंत सहा लोकांच्या मृत्यू झाल्याचं समोर आलं आहे. मृत्यू झालेले सर्वजण एकाच कुटुंबातील आहेत. या हल्ल्यात कुटुंबातील अन्य काही सदस्याही जखमी झाले आहेत.’

मृत्यू झालेल्यामध्ये दोन लहानग्यांचाही समावेश आहे. विनोद सोनी (४५), त्याचा मुलगा ओम सोनी (१०), करिया सोनी (८), विनोदचा मोठा भाऊ राजेन्द्र सोनी (६२), राजेन्द्रची मुलगी रानू सोनी (२५) आणि दिनेश सोनी यांचा मृत्यू झाला आहे. सुत्रांच्या माहितीनुसार विनोद सोनी भाजपा कार्यकर्ता होता. पोलिसांच्या प्राथमिक तपासानुसार, या सहा जणांची हत्या हरिश सोनी आणि त्याचा लहान भाऊ संतोष सोनी यांनी केली आहे. दोघांनाही पोलिसांनी अटक केली आहे.

मध्य प्रदेशचे माजी मुख्यमंत्री कमलनाथ यांनी ट्विट करत या घटनेबाबत दुख व्यक्त केलं आहे. कमलनाथ यांनी राज्य सरकारवर टीका केली आहे.