देशात दिवसागणिक करोनाबाधित रुग्णांच्या संख्येत झपाट्यानं वाढ होत आहे. दररोज ६० हजारांच्यापुढे करोनाबाधित रुग्ण आढळत आहे. मागील २४ तासांत देशात ६४ हजार ५५३ करोनाबाधित रुग्ण आढळे तर १००७ जणांचा मृत्यू झाला आहे. त्यामुळे देशातील करोना रुग्णांची एकूण संख्या २४ लाख ६१ हजार १९१ वर पोहोचली आहे.

आतापर्यंत देशात ४८ हजार ४० करोनाबाधित रुग्णांचा मृत्यू झाला असून गेल्या २४ चोवीस तासांमध्ये एक हजारांपेक्षा जास्त रुग्ण दगावल्याची माहिती केंद्रीय आरोग्य मंत्रालयाने दिली. दैनंदिन करोनामुक्त रुग्णांचीही विक्रमी नोंद झाली असून गेल्या चोवीस तासांमध्ये ५६,३८३ रुग्ण बरे झाले. हे प्रमाण ७०.७६ टक्क्यांवर पोहोचले असून सुमारे १७ लाखांपेक्षा जास्त रुग्ण बरे झाले आहेत. उपचाराधीन रुग्ण ६,६१,५९५ आहेत. मृत्यू दर दोन टक्क्यांपेक्षाही कमी १.९६ टक्क्यांवर आला आहे.

गेल्या चोवीस तासांमध्ये सर्वाधिक चाचण्या करण्यात आल्या. गुरुवारी दिवसभरात ८ लाख ४८ हजार ७२८ जणांच्या चाचण्या केल्या गेल्या. एकूण २.७६ कोटी चाचण्या झाल्या असून १० लाख लोकसंख्येमागे १९ हजार ४५३ चाचण्या केल्या जात आहेत. या आठवडय़ात प्रतिदिन ६ लाखांपेक्षा जास्त चाचण्या केल्या गेल्या आहेत.