News Flash

दक्षिण कोरियाला वादळाचा तडाखा, जपानमध्येही हानी

पावसामुळे रस्त्यांवर पाणी साठले असून हजारो घरातील वीज पुरवठा खंडित झाला आहे

(संग्रहित छायाचित्र)

 

दक्षिण जपानमधील बेटांना तडाखा देत अनेक लोकांना जखमी करणाऱ्या हायशेन वादळाने आता दक्षिण कोरियाला झोडपून काढले असून त्यामुळे इमारतींचे नुकसान झाले.

पावसामुळे रस्त्यांवर पाणी साठले असून हजारो घरातील वीज पुरवठा खंडित झाला आहे. कोरियाच्या हवामान प्रशासनाने सांगितले की, हायशेन वादळाने पूर्व किनारपट्टीवरील सोकचो शहराला सोमवारी दुपारी तडाखा दिला. त्यानंतर दक्षिण कोरियाचा दक्षिण व पूर्व भाग यांनाही फटका बसला आहे. नंतर वादळाची तीव्रता कमी होत गेली असून सकाळी ताशी १४४ कि.मी. वेगाने वारे वाहात होते. येत्या बारा तासात वादळाची तीव्रता कमी होत जाणार आहे.

जपान अग्निशमन व आपत्ती व्यवस्थापन संस्थेने म्हटले आहे की, किमान ३८ लोक वादळात जखमी झाले असून त्यात पाच गंभीर जखमी आहेत. हायशेन वादळाने जपानच्या वायव्य भागाला सप्ताहअखेरीस तडाखा दिला होता. त्यावेळी वादळी वाऱ्यांसह पाऊस झाला. हिरोशिमा व इतर शहरात दुकाने बंद होती.

दक्षिण कोरियात उलसान येथे पुराच्या पाण्यात मार्ग काढणे मोटारींना कठीण जात होते. किनारी बुसान, सोकचो व गँगनेउंग  येथे आपत्कालीन कर्मचाऱ्यांनी पडलेली झाडे दूर केली. अनेक ठिकाणी सिग्नलचे खांब व इमारती कोसळल्या. वादळात मोटार सापडून एकजण जखमी झाला. जेजू या दक्षिणेकडील प्रांतातून होणारी विमान उड्डाणे रद्द करण्यात आली. काही पूल व रेल्वेमार्ग बंद करण्यात आले. अनेक मच्छिमार बोटी व जहाजे सुरक्षित ठिकाणी आणण्यात आली. एकूण १६०० जणांना सुरक्षित ठिकाणी हलवण्यात आले.

जेजू व इतर भागात १७,६२० पैकी ११,५२३ घरांचा वीज पुरवठा खंडित झाला होता. तो सोमवारी पूर्ववत करण्यात आला. जपानमध्ये ओकिनावा व दक्षिणेकडील बेटांना वादळाने तडाखा दिला. त्यामुळे वाहतूक विस्कळति झाली, देशांतर्गत विमाने रद्द करण्यात आली. शिबा येथे भूस्खलनात चार लोक बेपत्ता झाले. जपानमध्ये अनेक घरांचा वीजपुरवठा पूर्ववत करण्यात आला, पण अजून ३ लाख ४० हजार घरात वीज पुरवठा बंद आहे.

गेल्याच आठवडय़ात मेसॅक वादळाचा फटका बसलेल्या उत्तर कोरियाला आता या नवीन वादळाचा फटका बसणार आहे. दरम्यान उत्तर कोरियातील वुनसान व टोंगचोन येथे पूर आला आहे. उत्तर कोरियात मेसॅक वादळाने बरेच नुकसान केले असून रस्ते व इमारतींचे नुकसान झाले. मदत कार्यात १२ हजार कर्मचारी सहभागी आहेत. हे सगळे घडत असतानाच आता उत्तर कोरियाला हायशेन वादळ झोडपून काढणार आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 8, 2020 12:22 am

Web Title: storm hits south korea damages japan abn 97
Next Stories
1 Coronavirus: चीनने पहिल्यांदाच जगासमोर आणली आपली पहिली लस; जाणून घ्या कधी येणार बाजारात?
2 मोदींनी पीएम केअर फंडाला कशी दिली मदत? प्रशांत भूषण यांनी पोस्ट केला खास व्हिडीओ
3 बिहार निवडणूक: एनडीएत फूट?; एलजेपीचा नितीशकुमारांच्या नेतृत्वाखाली निवडणूक लढवण्यास नकार
Just Now!
X