भाजपाचे नेते आणि बिहारचे माजी उपमुख्यमंत्री सुशील कुमार मोदी यांनी केलेलं ट्विट ट्विटरकडून डिलीट करण्यात आलं आहे. सुशील कुमार मोदी यांनी सध्या तुरूंगात शिक्षा भोगत असलेले राष्ट्रीय जनता पक्षाचे नेते लालू प्रसाद यादव यांच्यावर गंभीर आरोप करणारं ट्विट केलं होतं. मोदी यांचं ट्विट ट्विटरच्या आचारसंहितेचा भंग करणारं असल्यानं ट्विटरकडून ते डिलीट करण्यात आलं आहे. माजी उपमुख्यमंत्री सुशील कुमार मोदी यांनी लालू प्रसाद यादव तुरूंगातून सरकार पाडण्याचा कट रचत असल्याचा आरोप केला होता. ते तुरूंगातून एनडीएच्या आमदारांना फोन करून मंत्रीपद देण्याचं आश्वासन देत असल्याचंही मोदी यांनी म्हटलं होतं. एनडीएच्या आमदारांना कॉल आलेल्या नंबरवर आपण कॉल केला, तेव्हा लालू प्रसाद यादव यांनीच फोन उचलला. असं करून नका, यात तुम्ही यशस्वी होणार नाही, असं आपण त्यांना म्हणाल्याचं मोदी यांनी ट्विटमध्ये म्हटलं होतं. ट्विट डिलीट करण्याचं कारण सुशील कुमार मोदी यांनी लालू प्रसाद यादव यांच्यावर आरोप करताना कॉलचा उल्लेख केला होता. त्यातच त्यांनी तो मोबाईल नंबरही ट्विटमध्ये दिला होता. ट्विटमध्ये मोबाईल नंबर देणं ट्विटरच्या आचारसंहितेचा भंग असून, त्या कारणामुळे ट्विटरने हे ट्विट डिलीट केलं आहे. कॉल प्रकरणाची चौकशी सुरू लालू प्रसाद यादव यांना झारखंडमधील रांचीच्या तुरूंगात ठेवण्यात आलेलं आहे. तेथूनच त्यांनी कॉल केल्याचा दावा मोदी यांनी केला होता. दरम्यान, या प्रकरणाची चौकशी करण्याचे आदेश देण्यात आले आहेत. झारखंडचे तुरुंग महानिरीक्षक वीरेंद्र भूषण यांनी लालू प्रसाद यादव यांनी भाजपा आमदार ललन पासवान यांना कॉल केल्याच्या प्रकरणाची चौकशी करण्याचे आदेश दिले आहेत. चौकशी अहवाल प्राप्त झाल्यानंतर दोषींवर योग्य कारवाई करण्यात येईल, अशी माहिती भूषण यांनी दिली.
