हक्कानी नेटवर्कविरुद्ध ‘ठोस कारवाई’ करून दहशतवादी गटांमध्ये भेदभाव न करण्याची आपली बांधिलकी कायम राखावी, असे अमेरिकेने पाकिस्तानला सांगितले आहे. गेल्या आठवडय़ात ७० जणांचे बळी घेणाऱ्या काबूलमधील दहशतवादी हल्ल्याचा याला संदर्भ असल्याचे एका वरिष्ठ अमेरिकी अधिकाऱ्याने सांगितले. पाकिस्तानच्या भूमीवरून कार्यरत असलेल्या हक्कानी नेटवर्कसारख्या अफगाणी तालिबान गटांच्या कारवाया पाकिस्तान चालवून घेत असल्याबद्दल आम्ही पाकिस्तान सरकारच्या उच्च पातळीवरील नेतृत्वाला आमची चिंता कळवली आहे, असे स्टेट डिपार्टमेंटच्या प्रवक्त्या एलिझाबेथ त्रुद्यो म्हणाल्या. १९ एप्रिलला अफगाणिस्तानची राजधानी काबूलमध्ये झालेल्या भीषण दहशतवादी हल्ल्यानंतर अमेरिकेने ही काळजी पुन्हा पाकिस्तानला बोलून दाखवली. हा हल्ला हक्कानी नेटवर्कने केल्याचा आणि त्यांना पाकिस्तान सरकारचा पाठिंबा असल्याचा अफगाणिस्तानच्या अधिकाऱ्यांचा आरोप आहे.