जम्मू काश्मीर पोलिसांनी तीन दहशतवाद्यांना अटक केली आहे. जम्मू काश्मीर-पंजाब सीमारेषेवर या दहशतवाद्यांना अटक करण्यात आली. गुरुवारी सकाळी ही करण्यात आली. यावेळी पोलिसांनी दहशतवाद्यांकडून सहा एके-४७ रायफल्स जप्त केल्या आहेत. लखनपूर येथे पोलिसांनी ट्रक तपासणीसाठी थांबवलं असता ही कारवाई करण्यात आली. पोलीस सुत्रांनी दिलेल्या माहितीनुसार, दहशतवादी ट्रकमधून शस्त्रांची वाहतूक करत होते.

गुरुवारी सकाळी आठ वाजण्याच्या सुमारास जम्मू-पठाणकोट हायवेवर तपासणीसाठी ट्रक थांबवण्यात आला होता. तपासणी केली असता सहा एके-४७ रायफल्स सापडल्या अशी माहिती जम्मू काश्मीरचे पोलिस महानिरीक्षक मकेश सिंह यांनी दिली आहे. ट्रक पंजाबमधील बामियाल येथून काश्मीरच्या दिशेने चालला होता.

पोलीस याप्रकरणी अजून तपास करत असल्याचंही मकेश सिंह यांनी सांगितलं आहे. अटक करण्यात आलेल्यांची सध्या चौकशी सुरु असल्याची माहिती देण्यात आली आहे.