डेहराडून-वाराणशी एक्स्प्रेसचे डबे बचरावन स्थानकानजीक रुळावरून घसरल्याने शुक्रवारी ते तेथून हटवण्यात आल्यानंतर उत्तर रेल्वेच्या लखनौ- वाराणशी मार्गावरील रेल्वे वाहतूक नेहमीप्रमाणे सुरू झाल्याचे अधिकाऱ्यांनी सांगितले.या अपघातानंतर अनेक तास या मार्गावरील वाहतूक विस्कळीत झाली होती. क्रेन्सच्या साहाय्याने गाडीचे चेपलेले डबे रुळांवरून हटवण्यात आले. इंडो-तिबेटन बॉर्डर पोलीस आणि स्थानिक पोलीस यांनी रेल्वे व स्थानिक प्रशासनाला मदतकार्यात सहकार्य केल्यानंतर शुक्रवारी सायंकाळनंतर रेल्वेगाडय़ांची वाहतूक पूर्ववत करण्यावर लक्ष केंद्रित केले.या अपघातात ३८ जण ठार, तर सुमारे दीडशे जखमी झाले होते. जखमींवर रायबरेली व लखनौच्या इस्पितळांमध्ये उपचार करण्यात आले.
