भारतीय जवानांना एलओसी समोरील नौशेरा सेक्टरमध्ये दोन पाकिस्तानी सैनिकांना ठार करण्यात यश आले. मंगळवारी पाकिस्तानी सैन्याने शस्त्रसंधीचे उल्लंघन करत सीमारेषेवर गोळीबार केला होता. यास भारतीय जवानांकडून चोख प्रत्युत्तर दिले गेले. सुत्रांच्या हवाल्याने एएनआयने हे वृत्त दिले आहे.

या अगोदर जम्मू-काश्मीरच्या पूंछ जिल्ह्य़ात प्रत्यक्ष नियंत्रण रेषेवर पाकिस्तानच्या सैनिकांनी शस्त्रसंधीचे उल्लंघन करून केलेल्या गोळीबारात सीमा सुरक्षा दलातील (बीएसएफ) एक उपनिरीक्षक शहीद झाले होते.

बीएसएफ रायझिंग डे साजरा करीत असतानाच उपनिरीक्षक शहीद होण्याची घटना घडली आहे. प्रत्यक्ष नियंत्रण रेषेवर राजौरी क्षेत्रात पाकिस्तानने शस्त्रसंधीचे उल्लंघन करून केलेल्या गोळीबारात बीएसएफचे उपनिरीक्षक पी. ग्युइट हे शहीद झाले. ग्युइट यांनी सहकाऱ्यांचे प्राणही वाचविले. नोव्हेंबरमध्ये पाकिस्तानच्या गोळीबारात लष्कराचे चार जवान, बीएसएफ अधिकाऱ्यासह ११ जण शहीद झाले.