सातवीत शिकणाऱ्या मुलाने शेजारी राहणाऱ्या चार वर्षांच्या मुलीवर बलात्कार केल्याची धक्कादायक घटना उत्तर प्रदेशात घडली. पोलिसांनी आरोपी मुलाला अटक केली असून त्याची रवानगी बालसुधारगृहात करण्यात आली आहे. नोएडातील सेक्टर ७३ येथे परराज्यातून आलेले कामगार व मजूर राहतात. पीडित मुलगी व आरोपी मुलगा (वय १४ वर्ष) याच परिसरात राहत होते. पीडित मुलीचे आई- वडील सोमवारी कामानिमित्त बाहेर गेले होते. तर आरोपी मुलगा हा शाळेत गेलाच नव्हता. दुपारी घरी कोणीही नसताना त्याने शेजारी राहणाऱ्या चार वर्षांच्या मुलीला चॉकलेट देण्याच्या बहाण्याने घरी नेले आणि तिच्यावर बलात्कार केला. पीडित मुलीला घरी परतल्यावर पोटदुखीचा त्रास सुरु झाला. आई कामावरुन परतल्यावर तिने आईला घडलेला प्रकार सांगितला. त्यांनी मुलीला तातडीने रुग्णालयात दाखल केले आणि पोलिसांना या घटनेची माहिती दिली. वैद्यकीय तपासणीत मुलीवर बलात्कार झाल्याचे स्पष्ट झाले असून पोलिसांनी बलात्कार करणाऱ्या मुलाला अटक केली. त्याची रवानगी बालसुधारगृहात रवानगी करण्यात आली आहे. पीडित मुलीवर रुग्णालयात उपचार सुरु असून सध्या तिची प्रकृती स्थिर असल्याचे रुग्णालयातील डॉक्टरांनी सांगितले.
